Нягледзячы на тое, што тыраж UNItime распаўсюджваецца з высокай хуткасцю, кожны студэнт можа пачытаць артыкулы на актуальныя тэмы, узяўшы студэнцкі глянец у чытальнай зале бібліятэкі на сваім факультэце.
На працягу лета 2009 была сфарміравана рэдакцыйная калегія, падабраны журналісты і фатографы, дзякуючы зладжанай штодзённай працы якіх быў створаны часопіс. 15 верасня 2009 выйшаў пілотны нумар, 15 студзеня 2010 – першы нумар. У верасні гэтага года чытайце часопіс з тэмай «Ёсць нагода».
Першы студэнцкі глянцавы часопіс пазіцыянуе ідэалогію БДУ, розныя сферы дзейнасці ВНУ, падае дакладную інфармацыю пра найважнейшыя падзеі нашага ўніверсітэта, інфармуе пра знакамітых выпускнікоў і выбітных асоб.
Каманда часопіса ўвесь час расце. Кожны творчы студэнт, які жадае ўдзельнічаць у стварэнні такога праекта, можа адправіць свае ідэі на пошту unitime@inbox.ru. А тым, у каго душа не ляжыць да журналістыкі, фатаграфіі, дызайну, сацыялогіі, прапануем не заставацца ўбаку: каментуйце нумары на форуме сайта studgorodok.bsu.by і ў групе сайта vkontakte.ru «Unitime – першы глянцавы студэнцкі часопіс БДУ».
«Якія перспектывы Вы бачыце для каманды UNItime?» – спыталі мы ў рэктара БДУ Сяргея Уладзіміравіча Абламейкі.
«Працягваць працаваць. Вы задумалі часопіс – мы дапамагаем. Трэба рабіць усё ў добрым рытме. Фармат выдання змяняць не трэба. Зараз яно ўніверсітэцкае, потым, магчыма, будзем рухацца далей. Зараз займаемся ўніверсітэцкім ТБ, увосень апрабуем яго ў БДУ, а потым «пойдзем» у іншыя ўніверсітэты. UNItime трэба расці творча. Пасля заканчэння ВНУ экс-студэнт з каманды часопіса зможа ацэньвальна паглядзець на залатыя ўніверсітэцкія гады і сказаць: «Так, я рабіў гэта не дзеля грошай…» Вось мой артыкул, або фатаграфіі, або дызайн, напрыклад. Гэтым можна будзе ганарыцца».
Працуючы над часопісам год, яго стваральнікам ужо ёсць чым ганарыцца: на рахунку часопіса ўжо дзве прэміі: снежань 2009 – грант конкурсу «Найлепшы моладзевы праект» і 2 месца на III адкрытым студэнцкім PR-форуме «Папараць-кветка–2010».
University time – твой час. Развівайся разам з UNItime!
Вольга БУДЗЕНIС, Беларускi унiверсiтэт
