У процівагу некаторым замежным СМІ беларускім медыя важна зрабіць акцэнт на канструктыўных аспектах узаемадзеяння Беларусі з Захадам.
Такое меркаванне выказаў намеснік міністра інфармацыі Уладзімір Матусевіч на пасяджэнні навукова-практычнага семінара «Іміджафарміруючыя рэсурсы навуковых ведаў аб Беларусі» ў Акадэміі кіравання пры Прэзідэнце Беларусі, перадае БЕЛТА.
Намеснік міністра адзначыў, што ў Беларусі не маюць ілюзій наконт таго, што ў бліжэйшы час характар асвятлення падзей у краіне буйнымі заходнімі СМІ зменіцца. «Па такіх напрамках, як ацэнка палітычных працэсаў, гэта наўрад ці магчыма», — лічыць намеснік міністра.
«У сувязі з гэтым вельмі важна фарміраваць свой новы парадак дня, рабіць акцэнты на канструктыўных аспектах нашых узаемаадносін у эканамічнай, культурнай сферах. Трэба задзейнічаць СМІ, рэсурсы дыппрадстаўніцтваў, прамыя кантакты зацікаўленых арганізацый, экспертных супольнасцей, грамадскіх структур, асобных грамадзян», — сказаў Уладзімір Матусевіч.
