10 верасня ў холе галоўнага корпуса і Інстытута журналістыкі БДУ пачаў трансляцыю першы міжуніверсітэцкі відэаканал «Універсітэт-ТБ». Прэзентацыя ж адбылася 1 верасня 2010 г. на традыцыйным свяце першакурснікаў «Віват, студэнт!».
Праект створаны па прапанове Адміністрацыі Прэзідэнта РБ і пры падтрымцы главы дзяржавы. «Універсітэт-ТБ» аб’яднае ўсіх студэнтаў Мінска, а ў перспектыве і Беларусі. Гэта тэлебачанне адрозніваецца ад таго, што мы прывыклі бачыць. Канал будзе інфармаваць студэнтаў і выкладчыкаў пра падзеі, якія адбываюцца ва ўніверсітэцкай супольнасці, пра навіны адукацыі і развіццё культурнага патэнцыялу ў моладзевым асяроддзі.
Кантэнт відэаканала складаецца з тэматычных блокаў відэа-праграм працягласцю 3–5 хвілін, у тым ліку інфармацыйных (навіны, спорт, прагноз надвор’я), пазнавальных, забаўляльных, сацыяльных і грамадзянскіх праектаў. Ас-ноўнай аўдыторыяй стануць студэнты і выкладчыкі ўсіх ВНУ.
«У-ТБ» дапоўніць навуковую і адукацыйную дзейнасць універсітэтаў сучаснымі аўдыявізуальнымі тэхналогіямі. Пры гэтым ствараюцца спрыяльныя ўмовы для міжуніверсітэцкіх кантактаў і для выхаду відэаканала на рэспубліканскі ўзровень.
Лілія ПЯТЛІЦКАЯ, «Універсітэт»
