Алег Праляскоўскі: У 2013-м зэканомлена больш за Br 30 млрд

Мінулы год прайшоў пад знакам рэфармавання розных напрамкаў галіны. Аб гэтым на выніковай калегіі Міністэрства інфармацыі расказаў яго кіраўнік Алег Праляскоўскі.

Нагадаем, што 2013-ы быў абвешчаны Годам беражлівасці. Таму работа ведамства ішла ў гэтым накірунку. Зэканомлена больш за 30 мільярдаў бюджэтных сродкаў. Гэта адбылося ў тым ліку і дзякуючы аптымізацыі сістэмы друкаваных СМІ. У першую чаргу размова пра стварэнне двух буйных медыяхолдынгаў: «Звязда» і «Советская Белоруссия». Сёння можна канстатаваць, што гэты працэс завершаны паспяхова. Самае галоўнае, як лічыць міністр, ніхто з творчых і адміністрацыйных работнікаў не быў пакрыўджаны і выкінуты на вуліцу. Неабходнасць стварэння медыяхолдынгаў была прадыктавана жыццём. Многія газеты былі падобныя адна да адной. Зараз дзякуючы адзінай выдавецкай палітыцы кожная шукае сваю нішу.

Сур’ёзная работа праводзілася і па ўдасканальванні паліграфічнай галіны. У выніку аб’яднаны два буйнейшыя прадпрыемствы — фабрыка каляровага друку і Паліграфкамбінат імя Я. Коласа. Апошні быў перанесены на ўскраіну сталіцы, такім чынам выслабаніўся цэлы квартал у цэнтры горада. Вельмі хутка знайшліся інвестары, і дзяржава ўжо атрымала некалькі дзясяткаў мільёнаў долараў.

Завяршаецца рэфармаванне ў кнігагандлі. Як прыклад Алег Праляскоўскі прывёў «Белкнігу». Па тым жа прынцыпе будуць працаваць і пры перабудове сістэмы «Саюздруку». «Яна працуе дастаткова эфектыўна, і ў той жа час неабходна аб’яднанне фінансавых і лагістычных патокаў, — адзначыў міністр. — Гэтым і будзем займацца ў бліжэйшай будучыні».

Яшчэ адзін пункт у планах на бягучы год — стварэнне так званай віртуальнай прыёмнай. Гэта адзіны магутны партал, куды са сваім пытаннем зможа звярнуцца любы грамадзянін Беларусі. Можна сказаць «Адно акно ў Інтэрнэце». Работа чакае складаная, але згодна з даручэннем Прэзідэнта яна павінна быць скончана да канца 2014-га.

Сярод дасягненняў мінулага года Алег Праляскоўскі таксама адзначыў работу раённай прэсы: «Акрамя таго, што амаль усе газеты, а іх каля ста дваццаці, перайшлі на самаакупнасць, яны актыўна канкурыруюць у медыяпрасторы з такімі грандамі, як «Комсомольская правда» і «Советская Белоруссия», і займаюць другое-трэцяе месца ў чытачоў». Тыя ж поспехі і ў рэгіянальнага тэлебачання. Сур’ёзная задача ў міністэрства і «сувязістаў» — пераход на лічбавае вяшчанне. Работа ўжо распачата, некалькі раёнаў пераведзены на «лічбу». Прыемна, што ідуць толькі добрыя водгукі, людзі дзякуюць за добрую «карцінку».

— Мы шмат зрабілі ў мінулым годзе і добра ведаем, што будзем рабіць у бягучым. Гэта мы вызначылі яшчэ чатыры гады таму. Зараз з пэўнымі карэкціроўкамі рухаемся ў рэалізацыі праграмы, — адзначыў Алег Праляскоўскі.

Популярность: 1% [?]

Нет комментариев

Оставить комментарий

Вы должны быть авторизованы для того, чтобы оставить комментарий.